Matthew 20
Digau ngalua i lodo di hadagee waini
1“Tenua o God di Langi e hai gadoo be taane hai hadagee ne hana haga luada loo belee halahala ana daangada e ngalua i dana hadagee waini. 2Mee ga hagababa ang gi digaula bolo ia ga hui laa digaula gi di hui donu ngalua, silber e dahi i di laangi, geia ga hagau digaula e ngalua i lodo dana hadagee waini. 3Di laa e hiwa, gei mee ga hana labelaa gi di gowaa huihui mee, ga gidee ia nia daangada, nadau moomee ai. 4Mee ga helekai gi digaula, Goodou hula labelaa ngalua i lodo dagu hadagee waini. Au ga hui laa goodou di hui dela e donu. 5Digaula ga hula, gei mee ga hana labelaa di laa e madangaholu maa lua mo di laa e dolu, ga hai go dana hai nogo hai luada. 6Di laa e lima, gei mee ga hana labelaa gi di gowaa huihui mee, ga gidee ia labelaa digau i golo nadau moomee ai. Mee ga heeu gi digaula, Goodou e nohonoho beleiaha di madagoaa waalooloo di mee ne hai ai? 7Digaula ga helekai gi mee boloo, Idimaa tangada e haga ngalua gimaadou ai. Gei mee ga helekai gi digaula boloo, Goodou hula labelaa ngalua i lodo dagu hadagee waini. 8Ga hiahi ia di mee, tangada dana hadagee ga gahi mai tagi o di moomee gi gahigahia mai digau ngalua, huia digaula, daamada digau ala ne lloomoi muliagi ga dae loo gi digau ala matagidagi. a 9Digau ala ne daamada ne ngalua di laa e lima, tangada e dahi e hui gi di bahihadu silber e dahi. 10Digau ala ne daamada ne ngalua mai luada le e hagamaanadu bolo ginaadou ga hui damana i digau ala ne ngalua muliagi, gei deeai, tangada e dahi e hui di bahihadu silber e dahi. 11Digaula ne kumi nadau bahihadu, ga helekai tamu i tangada dana hadagee, 12boloo, Digau aanei ne ngalua hua i di aawaa e dahi, gei gimaadou gu duadua i di laangi dogomaalia i di laa, gei goe ne hui gimaadou be di mee e dahi. 13Tangada dana hadagee ga helekai gi tangada e dahi i digaula boloo, Dogu ihoo hagaaloho nei, au digi halahalau ina goe. Gidaua gu donu ngaadahi bolo ma di bahihadu silber e dahi i di laangi e dahi. 14kae ina doo hui, hana gi doo hale. Deenei dogu hiihai belee hui digau ala ne gahi mai muliagi, gadoo be doo hui dela ne gowadu gi di goe. 15Au hagalee donu i dagu haga hai hegau agu bahihadu aanei be dagu hiihai? Be goe e dubua gi dogu dumaalia ne hai?” 16Gei Jesus ga helekai, “Digau ala muliagi, ga hula laa mua, gei digau mugi mua, ga hula la muli.” bTolu holongo o Jesus ne hagi aga dono made
(Mark 10.32-34; Luke 18.31-34)
17Di madagoaa Jesus nogo hana gi Jerusalem, geia ga haga dagabuli mai ana dama agoago dilongoholu maa lua gi mada ginaadou, 18ga helekai gi digaula, “Goodou hagalongo, gidaadou ga hula gi Jerusalem gi di gowaa e kumi Tama Tangada, ga lahi gi baahi o nia dagi hai mee dabu mono gau hagadondonu haganoho, ga hagi aga, ga daaligi gi made. 19Digaula ga wanga a mee gi digau tuadimee, e hai ginai nadau tene gi haga mamaawa ina gei gi daudaulia gi di loobuu, gei i muli nia laangi e dolu, gei mee ga hagamouli aga!”Tangidangi tinana James mo John
(Mark 10.35-45)
20Di lodo Zebedee ne hanimoi gi Jesus mo ana dama daane dogolua, ga dogoduli gi mua o Jesus, ga dangi gi mee. 21Jesus ga heeu, “Ma di aha dela e hiihai ginai goe?”Di ahina ga helekai, “Meenei, heia dau hagababa mai gi di au, bolo goe ga haga noho agu dama daane dogolua aanei, e dahi i doo baahi gau donu, gei e dahi i di baahi gau ihala i doo madagoaa ma ga king iei goe.” 22Jesus ga helekai gi nia dama daane aalaa, “Goolua e de iloo di gulu mee dela e tangi ai. Goolua e mee di inu di ibu o di hagaduadua dela ga inu ko au?”
Meemaa ga helekai, “Gimaua e mee.” 23Jesus ga helekai labelaa gi meemaa, “E donu bolo goolua ga inu dagu ibu, gei au ogu donu ai e hilihili be koai e noho i dogu baahi gau donu, be i dogu baahi gau ihala, idimaa, go digau hua ala gu hagatogomaalia go Tamana e hai di mee deenei.” 24Nia dama agoago dilongoholu ne longono ginaadou, gei gu hagawelewele huoloo gi tagahaanau dogolua deenei. 25Jesus ga gahi mai digaula huogodoo gi di gowaa e dahi, ga helekai gi digaula, “Goodou e iloo bolo nia dagi o digau tuadimee e mogobuna e benebene digau o nadau henua, gei nadau gau aamua e dagi digaula. c 26Gei e hagalee hai beenei i godou mehanga. Ma iai tangada i goodou bolo ia gi aamua, geia gi hai tangada hai hegau ni goodou. d 27Maa iai tangada i goodou e hiihai e hai di tagi aamua, geia gi hai di hege. 28E hai gadoo be Tama Tangada dela ne hanimoi hagalee bolo nia daangada la gi ngalua ang gi deia, ge ngalua ang gi nia daangada, gei e wanga dono mouli belee haga dagaloaha digau dogologo.”
Jesus e haga gidee nia daane deegida dogolua
(Mark 10.46-52; Luke 18.35-43)
29Di madagoaa Jesus mo ana dama agoago ne hagatanga i Jericho, digau dogologowaahee gu daudali digaula. 30Nia daane deegida dogolua e noho i taalinga di ala, ga longono bolo Jesus e hanadu laalaa, meemaa ga daamada ga wolowolo, “Meenei, Tama a David! Aloho mai gi gimaua!” 31Digau dogologo aalaa ga wwou gi meemaa gi hudee hagalongoaa. Gei meemaa koia ne wwolowwolo gi nonua, “Meenei, Tama a David! Aloho mai gi gimaua!” 32Jesus ga duu, ga gahigahi meemaa ga heeu, “Ma di aha dela e hiihai ginai goolua gi heia adu?” 33Meemaa ga helekai, “Meenei, gimaua e hiihai bolo mau golomada gi gidee labelaa.” 34Jesus gu aloho i meemaa, ga bili gi nau golomada, gei di madagoaa hua deelaa, ginaua gu gidee, ga daudali a Jesus.
Copyright information for
KPG